સુરતના સેવાભાવી કલ્પેશભાઈ મહેતાએ નવી સિવિલ ખાતે ૧૫૧ હાઈજેનિક કીટ્સ અર્પણ કરી તેમના ૫૧મા જન્મદિનની સેવાસભર ઉજવણી કરાઈ
સામાન્ય રીતે લોકો પોતાના જન્મદિનની ઉજવણી કેક કાપી, પરિવાર અને મિત્રવર્તુળ સાથે હોટેલમાં પાર્ટી કરીને કરતાં હોય છે, પરંતુ સુરતના સેવાભાવી કલ્પેશભાઈ મહેતાએ નવી સિવિલના વોર્ડમાં દાખલ દર્દીઓને ૧૫૧ હાઈજેનિક કીટ્સ અર્પણ કરી તેમના ૫૧મા જન્મદિનની સેવાસભર ઉજવણી કરીને યાદગાર બનાવ્યો હતો.
તા.૧૩મી ફેબ્રુઆરીએ વિશ્વ એનિમિયા દિવસની ઉજવણી કરવામાં આવે છે. ત્યારે શ્રી મહેતાએ બાળકોને પોષણયુક્ત કિટનું વિતરણ કરવામાં આવ્યું હતું. ૫૧મા જન્મદિનને યાદગાર બનાવવા સિવિલ હોસ્પિટલના બાળરોગ વિભાગમાં બાળકો નેપ્કીન, સાબુ, ટુથ બ્રશ, ટુથપેસ્ટ, કોપરેલ તેલ, ઉલિયું, ગ્લાસ, કાસકો, થાળી, વાટકો, કપ, રૂમાલ, સેનેટરી પેડ્સ જેવી જીવનજરૂરી ચીજોની કિટનું ફિટલ મેડિસિન વિભાગના વડા ડો.બિનોદિની ચૌહાણને હસ્તે અર્પણ કરવામાં આવી હતી. આ સાથે ૩૦૪ કિલો ગોળ, ખજુર અને ચણાની પોષણ કીટ નવી સિવિલ હોસ્પિટલના સ્ત્રી વિભાગની ૧૫૧ ધાત્રી માતાઓ, સગર્ભા માતાઓ, પ્રસુતા બહેનો અને જરૂરિયાતમંદ દર્દીઓને અર્પણ કરી હતી. તેમજ શ્રી મહેતા વારતહેવારે સફાઈકામદારો બહેનો, નર્સિંસ બહેનો તેમજ દર્દીઓને, બાળકોને છત્રી, બ્લેન્કેટ, બેબી કિટ, સાડી સહિતનું જરૂરીયાત એવી તમામ વસ્તુઓનું પરિવાર સાથે વિતરણ કરાઈ છે. તેઓ છેલ્લા કેટલાય વર્ષોથી નવી સિવિલના દર્દીઓ સાથે વ્હીલચેર, દવાઓ, ફળોની કીટ જેવી ચીજો અર્પણ કરીને આ પ્રકારે સેવા સાથે ઉજવણી કરે છે.
શ્રી મહેતાએ ડો.બિનોદિની મહેન્દ્રસિંહ ચૌહાણની ઉપસ્થિતિમાં વેલેન્ટાઈન ડેની પૂર્વ સંધ્યાએ ફિટલ મેડિસિન વિભાગમાં સગર્ભા માતાઓને પોષણ યુક્ત કિટ અને ગાઉન તેમજ સિવિલમાં દાખલ બાળદર્દીઓને હાઈજેનિક કીટ સાથે ગુલાબનું ફૂલ અર્પણ કરી જન્મદિવસની ઉજવણી કરી હતી.
નોધનીય છે કે, શ્રી મહેતાએ કોરોનાની કપરી પરિસ્થિતિમાં પણ સિવિલ હોસ્પિટલના કોવિડ દર્દીઓને માસ્ક, સેનેટાઈઝર, ટિફિન સહિત અન્ય મદદ પૂરી પાડવા સતત ખડેપગે કામગીરી નિભાવી હતી.
આ પ્રસંગે તબીબી અધિક્ષક ડો.ગણેશ ગોવેકર, ફિટલ મેડિસિન વિભાગના વડા ડો.બિનોદિની મહેન્દ્રસિંહ ચૌહાણ, રેડિયોલોજી વિભાગના વડા પૂર્વીબેન દેસાઈ, નર્સિંગ કાઉન્સિલના ઈકબાલ કડીવાલા, આરએમઓ ડો.કેતન નાયક, નર્સિંગ એસો.ના કિરણભાઈ ડોમડિયા, નિલેશ લાઠીયા, જગદિશ બુહા, ચેતન આહિર, સંજય પરમાર ઉપસ્થિત રહ્યા હતા.
