સુરત જિલ્લામાં સચિન વિસ્તારમાં કાર્યરત ધન્વંતરિ આરોગ્ય રથ દ્વારા ૫ વર્ષમાં ૧,૧૮,૯૬૪ લોકોને નિશુલ્ક સારવાર અપાઈ
ધન્વંતરિ આરોગ્ય રથ દ્વારા શ્રમિકોને નિશુલ્ક આરોગ્યલક્ષી સેવા-સુવિધા કામના સ્થળ પર જ આપવામાં આવી રહી છે
EMRI ગ્રીન હેલ્થ સર્વિસ દ્વારા સંચાલિત ધન્વંતરિ આરોગ્ય રથના ૫ વર્ષ પૂર્ણ થતાં ધન્વંતરિ આરોગ્ય રથના સ્ટાફ દ્વારા ઉજવણી કરવામાં આવી હતી. મેડિકલ ઓફિસર ડો.સ્નેહલબેન, પેરામેડિક મિતલબેન, લેબ ટેકનિશીયન સુરેખાબેન, લેબર કાઉન્સિલર સરોજબેન તેમજ પાયલટ પ્રશાંતભાઈ અને બાંધકામ સાઈટ પર કામ કરતા સુપરવાઇઝર તથા શ્રમિકો સાથે કેક કાપીને ૫ વર્ષની પૂર્ણતાની ઉજવણી કરાઈ હતી. સચિન વિસ્તારમાં કાર્યરત ધન્વંતરિ આરોગ્ય રથ દ્વારા ૫ વર્ષમાં ૧,૧૮,૯૬૪ લોકોને નિશુલ્ક સારવાર અપાઈ છે, ત્યારે ૫ વર્ષની પ્રશંસનીય કામગીરી બદલ લાભ લેનાર શ્રમિકો દ્વારા ધન્વંતરિ આરોગ્ય રથની કામગીરીને બિરદાવવામાં આવી હતી.
ધન્વંતરિ આરોગ્ય રથ દ્વારા શ્રમિકોને નિશુલ્ક આરોગ્યલક્ષી સેવા-સુવિધા કામના સ્થળ પર જ આપવામાં આવી રહી છે. જિલ્લામાં સચિન વિસ્તારના ધન્વંતરિ આરોગ્ય રથ દ્વારા સુરત શહેરના સચિન, વેસુ, ભીમરાડ, ઊન,ખજોદ વિસ્તારોની બાંધકામ સાઈટ પર જઈને ૫ વર્ષમાં ૫ વર્ષમાં ૧,૧૮,૯૬૪ આમ નાગરિકો, દર્દીઓને નિ:શુલ્ક નિદાન અને દવાઓ આપવામાં આવી છે, તેમજ ૩૩૯૨૭ થી વધુ લેબ રિપોર્ટ કરવામાં આવ્યા છે.
ધન્વંતરિ આરોગ્ય રથ દ્વારા લોહીના રિપોર્ટ, ડાયાબિટીસ, બ્લડ પ્રેશર, કાન, આંખ, ચામડી, હાડકાને લગતી બીમારી જેવી વિવિધ બીમારીઓનું નિદાન કરી અને સ્થળ પર દવાઓ આપવામાં આવે છે. તેમજ શ્રમિકોને સરકારની વિવિધ યોજનાઓ વિશે માહિતી આપી આભા-આઇડી, ઇ-નિર્માણ કાર્ડ સ્થળ પર બનાવી આપવામાં આવે છે.
