શ્રી માનસિંહભાઈ પટેલને ‘ખાંડ ઉદ્યોગ ગૌરવ એવોર્ડ-૨૦૨૬’ એનાયત.
સહકાર ક્ષેત્ર અને ખાંડ ઉદ્યોગમાં અગ્રેસર નેતૃત્વ પૂરું પાડનાર આદરણીય શ્રી માનસિંહભાઈ પટેલ સાહેબને તેમની દીર્ઘદ્રષ્ટિ અને ઉત્કૃષ્ટ સેવાઓ બદલ પ્રતિષ્ઠિત ‘ડેક્કન સુગર ટેક્નોલોજી એસોસિએશન’ તરફથી ‘ખાંડ ઉદ્યોગ ગૌરવ એવોર્ડ-૨૦૨૬’થી નવાજવામાં આવ્યા છે. આ ગૌરવપૂર્ણ સિદ્ધિ બદલ શ્રી મહુવા પ્રદેશ સહકારી ખાંડ ઉદ્યોગ મંડળી લિ. (મહુવા સુગર) પરિવાર દ્વારા તેમને હૃદયપૂર્વક વંદન અને ઉષ્માભર્યા અભિનંદન પાઠવવામાં આવ્યા છે.
ખાંડ ઉદ્યોગ અને સહકારી ક્ષેત્રના વિકાસમાં શ્રી માનસિંહભાઈ પટેલનું યોગદાન અત્યંત નોંધપાત્ર રહ્યું છે. ખેડૂતોના સર્વાંગી કલ્યાણ, ખાંડ કારખાનાઓના આધુનિકીકરણ તથા ગુણવત્તાયુક્ત ઉત્પાદન માટે તેમણે લીધેલા નિર્ણયો અને માર્ગદર્શનને કારણે આજે આ ક્ષેત્રે નવી ઊંચાઈઓ સર કરી છે. તેમની આ સિદ્ધિથી સમગ્ર સહકારી ક્ષેત્ર અને દક્ષિણ ગુજરાતના ખાંડ ઉદ્યોગમાં હર્ષની લાગણી વ્યાપી ગઈ છે.
આ પ્રસંગે મહુવા સુગરના ચેરમેન, વાઇસ ચેરમેન, બોર્ડ ઓફ ડિરેક્ટર્સ, સભાસદ ખેડૂત ભાઈઓ તથા તમામ કર્મચારીગણે સૂર પુરાવતા જણાવ્યું હતું કે, “શ્રી માનસિંહભાઈ પટેલ સાહેબને મળેલો આ એવોર્ડ સમગ્ર ખાંડ ઉદ્યોગ અને અમારા માટે અત્યંત ગૌરવની ક્ષણ છે. તેમનું કાર્યકુશળ નેતૃત્વ અને માર્ગદર્શન આપણને સહુને સતત પ્રગતિના પંથે આગળ વધવાની પ્રેરણા આપે છે.”
મહુવા સુગર પરિવાર તરફથી આદરણીય માનસિંહભાઈ પટેલ સાહેબને આ એવોર્ડ મેળવવા બદલ ખૂબ ખૂબ શુભકામનાઓ પાઠવવામાં આવે છે અને તેઓ ઉત્તરોત્તર સ્વાસ્થ્યપ્રદ દીર્ઘાયુ પ્રાપ્ત કરી સહકારી ક્ષેત્રનું નેતૃત્વ કરતા રહે તેવી અભ્યર્થના વ્યક્ત કરવામાં આવી છે.
