માંડવીની દીકરીએ રાષ્ટ્રીય ફલક પર મેળવી સિદ્ધિ: ‘ખેલો ઈન્ડિયા ટ્રાઈબલ ગેમ્સ-૨૦૨૬’માં મયુરી ગામીતે લાંબી કૂદમાં મેળવ્યો કાંસ્ય ચંદ્રક
છત્તીસગઢમાં તાજેતરમાં સંપન્ન થયેલા રાષ્ટ્રીય સ્તરના ‘ખેલો ઈન્ડિયા ટ્રાઈબલ ગેમ્સ-૨૦૨૬’માં સુરત જિલ્લાના માંડવી તાલુકાના વરજાખણ ગામની ખેલાડી મયુરી ગામીતે લાંબી કૂદ સ્પર્ધામાં બ્રોન્ઝ મેડલ (કાંસ્ય ચંદ્રક) જીતીને સમગ્ર રાજ્ય સહિત આદિવાસી સમાજનું ગૌરવ વધાર્યું છે. ગત ૨૫ માર્ચથી ૩ એપ્રિલ-૨૦૨૬ દરમિયાન યોજાયેલા આ રમત મહોત્સવમાં દેશભરમાંથી હજારો આદિવાસી રમતવીરોએ પોતાની ખેલ પ્રતિભાનું પ્રદર્શન કર્યું હતું, જેમાં મયુરીએ પોતાની અપ્રતિમ ચપળતા અને કૌશલ્યથી રાષ્ટ્રીય સ્તરે સફળતાનું શિખર સર કર્યું છે.
માંડવી તાલુકાના અંતરિયાળ ગ્રામ્ય આદિજાતિ વિસ્તારમાંથી આવતી મયુરી ગામીતે મર્યાદિત સાધનો વચ્ચે પણ પોતાની અવિરત મહેનત, દ્રઢ સંકલ્પ અને રમત પ્રત્યેની લગન દ્વારા આ સિદ્ધિ હાંસલ કરી છે. તેની સફળતાથી વરજાખણ ગામ સહિત સમગ્ર માંડવી પંથકમાં હર્ષની લાગણી છવાઈ છે અને ગ્રામજનો, રમતપ્રેમીઓના અભિનંદન મળી રહ્યા છે.
આદિજાતિ યુવાયુવતીઓને પણ મયુરી થકી પ્રેરણા મળશે. સાથોસાથ વધુ મહેનત અને કુશળતા થકી આગામી સમયમાં તે આંતરરાષ્ટ્રીય સ્તરે પણ દેશનું નામ રોશન કરે તેવી સૌએ શુભેચ્છા પાઠવી હતી.
