૭૦ની ઉંમરે પણ કામમાં અડગ: સુરતની શાંતાબેન મોચી અનેક બહેનો માટે પ્રેરણારૂપ
૩૦ વર્ષથી હસ્તકળાકારીગરી સાથે સંકળાયેલા શાંતાબેન સુરત અને બનાસકાંઠાની બહેનોને રોજગારી આપે છે
શાંતાબેનને રાજ્ય સરકારની ગંગાસ્વરૂપા સહાય યોજના અંતર્ગત દર મહિને રૂ.૧૨૫૦ની સહાય મળે છે
સુરત મહાનગરપાલિકા અને રાજ્યના શહેરી આજીવિકા મિશન દ્વારા શહેરી વિકાસ વર્ષ-૨૦૨૫ની ઉજવણી અંતર્ગત સ્વસહાય જૂથોની મહિલાઓ દ્વારા ઉત્પાદિત વસ્તુઓના પ્રદર્શન અને વેચાણ માટે તા.૧૯થી તા.૨૫ સપ્ટેમ્બર દરમિયાન અડાજણના જોગણીનગર પાર્ટી પ્લોટ ખાતે રાજ્યકક્ષાના મેળાનું આયોજન કરાયું છે. જેમાં નવરાત્રિને લગતા ટ્રેડીશનલ વસ્ત્રો, ઘરેણા સહિત ખાદીના પોષાક, હેન્ડમેડ તેમજ સુશોભનની ચીજવસ્તુઓનું વેચાણ કરવા આવેલા ૭૦ વર્ષીય શાંન્તાબેન જેઠાલાલ મોચી અનેક બહેનો માટે પ્રેરણારૂપ છે
મૂળ બનાસકાંઠા જિલ્લાના થરાદના રહેવાસી અને હાલ સુરતના પાલનપુર જકાતનાકા નજીકની નિલકંઠ સોસાયટીમાં રહેતા ૭૦ વર્ષીય શાંતાબેન મોચી વૃદ્ધાવસ્થામાં પણ આત્મનિર્ભર જીવન જીવવાની પ્રેરણા આપે છે.
છેલ્લા ૩૦ વર્ષથી તેઓ ચણિયા-ચોળી, વોલ પીસ, પર્સ સહિત કટલરી કવર જેવી વિવિધ વસ્તુઓ તૈયાર કરીને વેચાણ કરે છે. ખાસ વાત એ છે કે તેઓ બનાસકાંઠાની ૧૭ બહેનોને રોજગારી પૂરી પાડી રહ્યા છે. કાચો માલ કુરિયર દ્વારા મોકલીને આ બહેનો પાસેથી તૈયાર વસ્તુઓ મેળવીને તેઓ વેચાણ કરે છે.
વર્ષ ૨૦૨૧માં પતિના અવસાન બાદ શાંતાબેન દિકરા પાસે સુરત રહેવા આવ્યા. અહીં આવ્યા બાદ પણ તેમણે કામ છોડ્યું નહીં. વર્ષ ૨૦૨૨-૨૩માં તેમણે ૧૦ બહેનો સાથે મળીને ‘મોરીયા સખી મંડળ’ની સ્થાપના કરી અને સમૂહ આધારિત ઉત્પાદનોનું વેચાણ શરૂ કર્યું. આ પ્રયાસને પગલે સુરત મહાનગરપાલિકાથી રૂ. ૫૦,૦૦૦ની લોન અને રૂ. ૧૦,૦૦૦નું રિવોલ્વિંગ ફંડ મળ્યું.
તેમનો પુત્ર અગાઉ હીરાના કારખાનામાં નોકરી કરતો હતો. પરંતુ માતાના સંઘર્ષ અને સમર્પણ જોઈને તે પણ વહુ સાથે આ કાર્યમાં જોડાઈ ગયો છે. આજે પરિવાર સાથે મળી સ્વરોજગાર કરી રહ્યા છે.
શાંતાબેનને રાજ્ય સરકારની ગંગાસ્વરૂપા સહાય યોજનામાં દર મહિને રૂ.૧૨૫૦ની સહાય પણ મળી રહી છે. આ સાથે સરકારી સહાય અને પરિવારના સહકારથી તેઓ વધુ ઉત્સાહ સાથે કાર્ય કરી રહ્યા છે.
૭૦ વર્ષની ઉંમર છતાં શાંતાબેન હજી પણ આત્મનિર્ભરતાથી કામ કરી રહ્યા છે. તેઓ માત્ર પોતાના પરિવારનું ગુજરાન જ નહીં, પરંતુ બનાસકાંઠા અને સુરતની અનેક બહેનોને રોજગારી આપીને મહિલાશક્તિનું જીવંત ઉદાહરણ પૂરું પાડી રહ્યા છે.
