અંબિકા અને મહુવામાં પાણી જ પાણી! માત્ર 3 ઇંચ વરસાદમાં રસ્તાઓ બન્યા નદીઓ, વાહનવ્યવહાર ઠપ!
સુરત જિલ્લાના અંબિકા અને મહુવા તાલુકામાં મેઘમહેર: ઓવરટોપિંગને કારણે ગ્રામીણ માર્ગો બંધ, તંત્ર એલર્ટ
સુરત:
સુરત જિલ્લામાં ચોમાસાની ઋતુ દરમિયાન સાર્વત્રિક વરસાદી માહોલ જામ્યો છે. કંટ્રોલ રૂમના સત્તાવાર આંકડા અનુસાર જિલ્લાના અંબિકા તાલુકામાં 74 મીમી (લગભગ 2.91 ઇંચ) અને મહુવા તાલુકામાં 40 મીમી (લગભગ 1.57 ઇંચ) વરસાદ નોંધાયો છે. વરસાદને કારણે બંને તાલુકાના સ્થાનિક નાળાં અને કોઝવે પર પાણી ફરી વળતાં તંત્ર દ્વારા સલામતીના ભાગરૂપે અનેક ગ્રામીણ રસ્તાઓ વાહનવ્યવહાર માટે બંધ કરી દેવામાં આવ્યા છે.
માર્ગ અને મકાન વિભાગ તેમજ પંચાયત વિભાગની યાદી મુજબ, અંબિકા તાલુકામાં સૌથી વધુ અસર જોવા મળી છે જ્યાં કુલ 10 રસ્તાઓ પર પાણી ફરી વળવાથી વાહનવ્યવહાર ઠપ થયો છે. બંધ કરાયેલા માર્ગોમાં કોષ આંગલધરા રોડ, કોષ બાંભરો ફળિયા થી વડાવ રોડ, વહેવલ હટવાડા ઝાડી ફળિયા રોડ, વહેવલ ખુટી ફળિયા રોડ, મહુવરીયા કાંકરીમોરા રોડ, આંગલધરા પારસી ફળિયા રોડ, માછીસાદડા એપ્રોચ રોડ, ગાંગડીયા દાઉદપોર ફળિયા રોડ, ગાંગડીયા મહુડી ફળિયા રોડ તેમજ ઉપલી કોષ નહેર સર્વિસ રોડથી માંજી સરપંચ પરસોત્તમભાઇ હાઉસ અને ઉંટરવલ રોડ નો સમાવેશ થાય છે.
બીજી તરફ, મહુવા તાલુકામાં પણ ઓવરટોપિંગના કારણે ગ્રામીણ સંપર્ક રસ્તાઓને અસર પહોંચી છે. અહીં નવપરા સરકાર ફળિયા ટૂ બેગરીયા ફળિયા રોડ, ખરવણ ભીલ ફળિયા રોડ, ખરવણ કોઢાર ફળિયા રોડ, નળધરા વજેશિંગ થી કઢૈયા હનુમાન મંદિર રોડ અને નળધરા સરકાર ફળિયા રોડ પર પાણી ભરાઈ જતાં વાહનવ્યવહાર અટકાવી દેવાયો છે.
તંત્રના જણાવ્યા અનુસાર, તમામ અસરગ્રસ્ત રસ્તાઓ પરથી પાણી ઓસર્યા બાદ અને માર્ગો સલામત જણાશે ત્યારબાદ જ વાહનવ્યવહાર પૂર્વવત શરૂ કરવામાં આવશે. હાલ પૂરતી સ્થિતિને ધ્યાને રાખી સ્થાનિક ગ્રામજનો અને વાહનચાલકોને પાણી ભરાયેલા કોઝવે કે રસ્તાઓ પર સાહસ ન કરવા અને સલામત માર્ગોનો ઉપયોગ કરવા અપીલ કરવામાં આવી છે.
