અંબિકા તાલુકામાં ૧૫મી ઓગસ્ટે શિક્ષિકા પ્રતીક્ષાબેનનું તાલુકા કક્ષાએ શ્રેષ્ઠ શિક્ષક તરીકે બહુમાન
અંબિકા:-
આજે સમગ્ર દેશમાં ૧૫મી ઓગસ્ટ સ્વાતંત્ર્ય પર્વની ખૂબ જ ઉત્સાહ અને હર્ષોલ્લાસ સાથે ઉજવણી કરવામાં આવી રહી છે, ત્યારે અંબિકા તાલુકા મથકે યોજાયેલા તાલુકા કક્ષાના ધ્વજવંદન અને સાંસ્કૃતિક કાર્યક્રમમાં શિક્ષણ ક્ષેત્રે ઉત્કૃષ્ટ અને સરાહનીય પ્રદાન બદલ શિક્ષિકાશ્રી પ્રતીક્ષાબેનનું વિશેષ સન્માન કરવામાં આવ્યું હતું.
તાલુકા કક્ષાના આ ગૌરવશાળી કાર્યક્રમ દરમિયાન અંબિકા તાલુકા મામલતદારશ્રીના શુભ હસ્તે પ્રતીક્ષાબેનને ‘શ્રેષ્ઠ શિક્ષક એવોર્ડ’ એનાયત કરી સન્માનિત કરવામાં આવ્યા હતા.
ગામ અને તાલુકાનું ગૌરવ:
મૂળ અંબિકા તાલુકાના પુના ગામના વતની એવા પ્રતીક્ષાબેન હાલ અંબિકા તાલુકાની સાંબા પ્રાથમિક શાળામાં શિક્ષક તરીકે પોતાની નિષ્ઠાપૂર્વક ફરજ બજાવી રહ્યા છે. તેમના દ્વારા શિક્ષણના ઉત્થાન અને વિદ્યાર્થીઓના સર્વાંગી વિકાસ માટે કરવામાં આવેલા ભગીરથ કાર્યોની નોંધ લઈને આ એવોર્ડ આપવામાં આવ્યો છે.
આ પ્રસંગે મામલતદારશ્રી,મહુવા તાલુકા પંચાયત પ્રમુખ શિલ્પાબેન,કારોબારી અધ્યક્ષ રેખાબેન તેમજ ઉપસ્થિત અગ્રણીઓ અને ગ્રામજનોએ પ્રતીક્ષાબેનની શૈક્ષણિક સેવાઓને બિરદાવી હતી અને તેમને ભાવિ જીવન માટે શુભકામનાઓ પાઠવી હતી. પોતાના ગામનની દીકરી અને તાલુકાની શિક્ષિકાને આ સન્માન મળતાં પુના ગામ સહિત સમગ્ર અંબિકા તાલુકામાં આનંદ અને ગૌરવની લાગણી વ્યાપી ગઈ છે.
