ઝેરવાવરા ગામમાં 19 વર્ષના યુવકે અગમ્ય કારણોસર ગળે ફાંસો ખાઈ જીવન ટૂંકાવ્યું.
અંબિકા:-સુરત જિલ્લાના અંબિકા તાલુકાના ઝેરવાવરા ગામમાંથી એક અત્યંત દુઃખદ ઘટના સામે આવી છે,જ્યાં એક 19 વર્ષીય આશાસ્પદ યુવકે પોતાના જ ઘરમાં કોઈ અગમ્ય કારણોસર ગળે ફાંસો ખાઈને આપઘાત કરી લીધો છે.યુવકના આ આત્મઘાતી પગલાથી પરિવાર સહિત સમગ્ર પંથકમાં શોકનું મોજું ફરી વળ્યું છે.
મળતી વિગતો મુજબ,ઝેરવાવરા ગામના ભગત ફળિયામાં રહેતા અને ખેતીકામ કરતા પ્રવિણભાઈ કાંતિભાઈ પટેલના 19 વર્ષ અને 10 મહિનાના પુત્ર હર્ષકુમાર પટેલે ગઈકાલ તારીખ 11/07/2026 ના રાત્રે 11:00 વાગ્યાથી લઈ તારીખ 12/07/2026 ના વહેલી સવારના 03:00 વાગ્યાના સમયગાળા દરમિયાન પોતાના ઘરની પજારીમાં લાકડા સાથે નાયલોનની દોરી બાંધી ગળે ફાંસો ખાઈ લીધો હતો, જેના કારણે તેનું ઘટનાસ્થળે જ કમકમાટીભર્યું મોત નીપજ્યું હતું.
આ ઘટના અંગે મૃતકના પિતા પ્રવિણભાઈ પટેલે સ્થાનિક અનાવલ પોલીસ સ્ટેશનમાં વહેલી સવારે લગભગ પાંચ વાગ્યાના આસપાસ જાણ કરી હતી.ઘટનાની માહિતી મળતા જ પોલીસ ઘટનાસ્થળે પહોંચી હતી અને મૃતદેહને પોસ્ટમોર્ટમ અર્થે ખસેડવાની તજવીજ હાથ ધરી હતી.પોલીસે આ મામલે ભારતીય નાગરિક સુરક્ષા સંહિતા (BNSS) 2023 ની કલમ 194 હેઠળ અકસ્માત મોતનો ગુનો દાખલ કર્યો છે.આ કેસની વધુ તપાસ હેડ કોન્સ્ટેબલ દિવ્યેશભાઈ બાબુભાઈ ચલાવી રહ્યા છે.યુવકે કયા કારણોસર આ અંતિમ પગલું ભર્યું તે અંગે હજુ સુધી કોઈ ચોક્કસ માહિતી બહાર આવી નથી.
